Almennar fréttir

27. júní 2008

Undirritun verksamnings um snjóflóðavarnir í Bolungarvík

Verksamningur um byggingu snjóflóðavarna í Traðarhyrnu var undirritaður í ráðhúsi Bolungarvíkur 24. júní síðast liðinn. Það voru Sigurður Sigurðsson framkvæmdastjóri mannvirkjasviðs fyrir hönd Ósafls og Elías Jónatansson bæjarstjóri Bolungarvíkur sem undirrituðu samninginn. Tilboð Ósafls eru tæpar 567 milljónir en upprunaleg kostnaðaráætlun gerði ráð fyrir 727 milljónum. Varnagarðurinn er búin að vera í 10 ár í undirbúningi en árið 1998 hófust frumathuganir.

Varnagarðurinn verður reistur í Traðarhyrnu og á hann að verja íbúabyggðir undir Traðahyrnu og Ytragili.  Í verkinu felst að reisa varnargarð sem á að vera 18-22 metra hár og 700 metra langur. Auk þess verða átta ellefu metra háar keilur ofar  í fjallinu.
Samanlagt verður framkvæmdasvæðið um 10 hektarar. Áætlað er að um 400.000 m3 af fyllingarefni fari í verkið sem mun fást úr næsta nágrenni.

Varnagarðurinn var hannaður af Línuhönnun og Landmótun. Leitast var eftir í hönnuninni að fella varnagarðinn inn í sitt nánasta umhverfi. Framkvæmdir hefjast í sumar og lýkur árið 2010.
 

Twitter Facebook
Til baka

Fréttasafn