Fréttatilkynning frá Framkvæmdanefnd um einkavæðingu
Með auglýsingu sem birtist í Kauphöll Íslands 6. mars sl. óskaði framkvæmdanefnd um einkavæðingu eftir tilboðum í 39,86% hlut ríkisins í Íslenskum aðalverktökum hf. Í auglýsingunni voru tilgreindir skilmálar sölunnar ásamt þeim atriðum sem ráða myndi vali á tilboðsgjöfum til viðræðna um kaup á umræddum hlut.
Frestur til að skila inn tilboðum rann út 21. mars sl. og skiluðu eftirfarandi tilboðsgjafar inn tilboðum:
- Jarðboranir hf.
- JB Byggingafélag ehf. og Trésmiðja Snorra Hjaltasonar ehf.
- Joco ehf.
- Eignarhaldsfélagið AV ehf. Í tilboðshópnum eru stjórnendur og fjöldi starfsmanna Íslenskra aðalverktaka hf.
Ákveðið var að leita til Verðbréfastofunnar hf. um mat á tilboðunum út frá þeim forsendum sem tilgreindar voru í skilmálum sölunnar. Niðurstaða Verðbréfastofunnar hf. er sú að út frá þessum forsendum ætti að ganga fyrst til viðræðna við Eignarhaldsfélag AV ehf. á grundvelli tilboðs þeirra. Þessi niðurstaða var rædd í framkvæmdanefnd um einkvæðingu og lögð fyrir ráðherranefnd um einkavæðingu sem staðfesti niðurstöðuna.
Gert er ráð fyrir að niðurstaða fáist í viðræðurnar innan tveggja vikna.
Reykjavík, 25. apríl 2003
Framkvæmdanefnd um einkavæðingu